Toshkent viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo`limi xodimlari DXXChQ xodimlari bilan hamkorlikda yurtimiz hududiga yirik miqdordagi tamaki mahsulotlarini noqonuniy olib kirishga uringan shaxsning qilmishlarini fosh etishdi.
Davlat bojxona qo`mitasi matbuot xizmati xabariga ko`ra, viloyatning Bekobod tumanidagi chegara hududida o`tkazilgan tezkor tadbir davomida tun qorong`isida og`ir qopni ko`targancha chegaradosh hududda izg`ib yurgan shaxs xodimlar tomonidan qo`lga olingan.
Aniqlanishicha, ushbu shaxs 1990 yilda tug`ilgan, fuqaro F.X. bo`lib, u mamlakatimiz hududiga umumiy qiymati 210 mln. so`mlik, jami 9590 quti tamaki mahsulotlarini bojxona to`lovlarni to`lamasdan olib kirishga uringan.
Xorijda ishlab chiqarilgan va aksiz markasi bilan markalanmagan Business Royals nomli ushbu tamaki mahsulotlari ashyoviy dalil sifatida olib qo`yilgan.
Hozirda mazkur holat yuzasidan bojxona tekshiruvlari davom ettirilmoqda.
