“Qars ikki qo`ldan
chiqadi”, deya bejiz aytilmagan. Oila atalmish muqaddas qo`rg`onning tinch-totuvligi
er-xotinga birdek bog`liq. Biroq o`z “men”ini ustun qo`yadiganlar ham topiladi...
68 yoshli Yu.Bekmetov 2018 yilning 26 avgusti soat 15:30 lardarafiqasi G.Madraximova
bilan oralarida kelib chiqqan kelishmovchilik natijasida janjallashishadi...
“XOTINIMNI
O`LDIRISh NIYaTIM YO`Q EDI”
Sudlanuvchi Yu.Bekmetov
sud majlisida aybiga iqror bo`ldi.
— Kelinim kechki
ovqatga unnab, supachada masalliqlarni to`g`rab o`tirgandi. Rafiqam nabiralarini
kiyim-kechaklarini sal nariroqda yuvayotgandi. Nabiralarimning qo`lidan rafiqamning
telefonini olib, undagi raqamlar va “sms”larni ko`rib chiqdim. Qo`limdagi
telefonga ko`zi tushib, rafiqam qaytarib berishimni aytdi. Ichidagi narsalarni
ko`rib bo`lib, berishimni aytdim. Rafiqam o`zidan-o`zi so`kinib, haqorat qila boshladi.
Janjallashmoqchi bo`lganimda, kelinim ajratdi. Uyga kirib ketayotganimda xotinim orqamdan oyoq kiyimlar va idishlarni ota boshladi.
Otgan narsalari boshimga tegdi. Jahlim chiqib, oshxonada turgan pichoqni olib, uning
oldin yuz qismi, so`ng orqa ko`krak qismiga 2 marta sanchdim... Lekin uni o`ldirish
maqsadim bo`lmagan. Kelinim qichqirib yubordi, o`zim karaxt ahvolda qotib qoldim. Xotinim
supachadan pastga tushib, qo`shnining uyini
old qismiga bordi. Ketidan borib, “seni o`ldirmoqchi emasman. Ko`ngling tinchidimi,
endi? O`ldirmoqchi bo`lsam, shu erni o`zida o`ldirib qo`ya qolardim”, dedim. So`ng qo`shnim
va kelinim “pichoqni tashlang”, deb, uyga kirgizib yubordi. Uyga kirib, pichoqni
oshxonadagi stol ustiga qo`ydim. Xotinimning mazasi qochgani uchun kelinim “tez yordam”ga qo`ng`iroq
qilib tusholmadi. Keyin o`g`limga telefon qilib, uyga chaqirdi. Ikkovi xotinimni shifoxonaga olib ketishdi. Biroz vaqt o`tib, uyga
tuman IIB xodimlari kelishdi... Qilgan ishimdan chin ko`ngildan pushaymonman.
O`ktamjon Masharifov, jinoyat ishlari bo`yicha Yangiariq tuman sudi raisi:
— Yu.Bekmetov Jinoyat kodeksining 104-moddasi 1-qismida nazarda tutilgan jinoyatni sodir etganlikda aybli deb topildi. 3 yil muddatga ozodlikni cheklash jazosi tayinlandi.
Sadoqat ALLABERGANOVA