Xabaringiz bor, 22 yanvar kuni Chiroqchi tumanida yashovchi 32 yoshli erkak A.Yuning tuman IIB xodimlari tomonidan olib ketilgani va boshqarma binosidan murdasi chiqqani yuzasidan 30 yanvar kuni brifing bo`lib o`tdi.
Unda IIV Matbuot kotibi Sh.G`iyosov ishtirok etib, holat yuzasidan munosabat bildirgan edi. Jumladan, “IIB binosida odam o`limi bu yangilik emas. Bu holat ilgari ham bo`lgan. Shu va shunga o`xshash holatlar ortidan 2019 yilda 133 nafar xodimga nisbatan jinoiy ish qo`zg`atilgan”, — degan edi u.
Shundan so`ng ushbu fikrlar jamoatchilik tomonidan keng muhokamaga sabab bo`ldi. Ayni paytda IIV Matbuot kotibi yuqoridagi o`zi tomonidan aytilgan so`zlarga izoh bildirdi:
“Shuni aytish joizki, ilgari nafaqat ichki ishlar organlari, balki boshqa huquqni muhofaza qilish idoralari o`z faoliyati yoki jinoyat ishlari bo`yicha jamoatchilikka hech qanday ma`lumot berishmagan. Fuqarolarimizga axborot berish amaliyoti endi shakllanmoqda. Biz matbuot kotiblari sifatida bunga e`tibor qaratyapmiz. Mazkur brifing ham oxirgi yillarda davlatimiz tomonidan olib borilayotgan ochiqlik siyosatining yaqqol namunasidir.
Brifingda fuqarolarimizga etkazilmoqchi bo`lgan asosiy ma`lumot - bu ichki ishlar organlari binosida odam vafot etishi bilan bog`liq fakt, har qanday vaziyatda favqulotda holat deb qaralishi, bunday vaziyatda zudlik bilan alohida ishchi guruh tuzilib, ish jarayonlari to`liq o`rganilishi va ushbu holatni kelib chiqish sabab va sharoitlari bartaraf etilishi, aybdor xodimlar va rahbarlar esa munosib jazolanishi muqarrarligi edi. Aynan Qashqadaryoda biz ushbu maqsadga erishdik deb o`ylayman.
Brifing boshidan yakunigacha jurnalist va fuqarolar bilan oshkora, samimiy ruhda o`tganligi, ichki ishlar organlari o`zining axborot xizmati vakillari orqali fuqarolarga ochiqligini namoyish qilganligi, jurnalistlar va fuqarolarning ko`plab savollari va muammolari joyida hal etilganligiga e`tibor qaratish zarur, degan fikrdaman.
Ishonamanki, fuqarolarimizga axborot etkazish faoliyatidagi kamchiliklarimizni bartaraf etishda jamoatchilikning sog`lom tanqidini doim inobatga olamiz. Deputatlarimizning ham bu masalaga e`tibor berishlari hurmatga sazovor bo`lib, o`ylaymanki, birgalikda xalqimiz oldidagi vazifalarimizni bajarishda bir-birimizga ko`makdosh bo`lamiz”, — degan Ichki ishlar vazirining matbuot kotibi Sh.G`iyosov.