Олий Мажлис Қонунчилик палатаси депутати Дониёр Ғаниев 29 декабрь куни Конгресс холлда ўтказилган давлат раҳбарининг мурожаатномасига бағишланган тадбирдан сўнг журналистларга интервью берди. «Газета.uz»нинг хабар беришича, у давлат харидлари соҳасида манфаатлар тўқнашувига оид ҳолатларга қонунчиликда жавобгарлик белгиланмаганини таъкидлаган.
«Жиззах билан Андижонда бўлаётган воқеалар аслида ўзи янгилик эмас. Фақатгина жамоатчиликка эндигина ошкор қилингани учун «хайп» яратаяпти. Бу аслида, йиллар давомида амалга оширилиб келинаётган амалиёт. Биринчи маротаба бўлаётгани йўқ, бу икки воқеа аслида «айсберг»нинг учи. Ушбу муаммони деярли ҳамма вилоятда топасиз. Бу муаммога Жиззах ёки Андижон мисолида эмас, балки биз тизимли ечим таклиф қилишимиз керак», — деди депутат.
Шу билан бирга, у вилоятлардаги давлат буюртмаларига оид тендер савдоларида таниш-билишчилик ҳолатларини Андижон вилояти прокуратураси ва Коррупцияга қарши курашиш агентлиги ўрганиши бўйича ҳам фикр билдирди.
«Уларнинг текшируви натижасида маблағларни ноқонуний ўзлаштириш бўлса, жиноий жавобгарлик қўллаш мумкин. Лекин агар кўрсатилган маблағларга етарли хизмат тақдим этилган бўлса, бунга жавобгарликнинг ўзи йўқ. Афсуски қонунларимиз шунақа», дея қайд этди Дониёр Ғаниев.Олий Мажлис Қонунчилик палатаси депутати Дониёр Ғаниев 29 декабрь куни Конгресс холлда ўтказилган давлат раҳбарининг мурожаатномасига бағишланган тадбирдан сўнг журналистларга интервью берди. «Газета.uz» мухбирининг хабар беришича, у давлат харидлари соҳасида манфаатлар тўқнашувига оид ҳолатларга қонунчиликда жавобгарлик белгиланмаганини таъкидлаган.
Депутат парламент қуйи палатаси 1 декабрь куни қабул қилган янги таҳрирдаги «Давлат харидлари тўғрисида"ги қонун лойиҳасида мазкур муаммо ўз ечимини топганини таъкидлади.
«Давлат харидлари тўғрисидаги янги қонун, ўйлайманки, мана шу муаммоларга тизимли ечим бўйича илк қадам бўлади. Бу қонун билан биринчи марта маъмурий жавобгарликни белгилаймиз. Ҳозир Жиззах ва Андижондаги воқеада ҳуқуқий жавобгарликнинг ўзи йўқ. Манфаатлар тўқнашуви бор. Лекин агар у пулни ўмармаган бўлса, яъни белгиланган маблаққа хизмат кўрсатган бўлса, унга жавобгарлик йўқ. У фақат манфаатлар тўқнашуви бўйича давлат харидларини бузган, лекин жавобгарлик қонунда белгиланмаган. Биз шу муаммони Қонунчилик палатасида янги қонун билан ечиб, уни қабул қилдик. Ҳозир Сенатга кетган. Қонун билан энг юқориси — 50 бараваргача (БҲМнинг миқдори — таҳр.) маъмурий жавобгарлик белгилаяпмиз, техник хато бўлса 10 бараваргача жарима қўлланилади», — деди Дониёр Ғаниев.
Депутат, шунингдек, аслида бу жарима етарли бўлмаслиги мумкинлигини ҳам қўшимча қилди.
«Аслида менинг фикрим, бу ҳам ҳозирча кам, — деди депутат. Қаршиликлар кўп бўлди, парламентнинг ўзида камми, кўпми? деган муҳокама бўлди. Мана шуни жорий этсак, биринчи қадам бўлса, буни амалиётда натижасини ҳам кўрамиз. Яъни жарималарнинг жорий этилиши ижобий натижа берадими ёки етарли эмасми? Етарли бўлмаса, кейинги қадам — керак бўлса манфаатлар тўқнашуви қисмига жиноий жавобгарликни белгилаш керак. Буни энди амалиётда босқичма-босқич кўрамиз», — дея қўшимча қилди депутат.
Эслатиб ўтамиз, сал аввал таниш-билишчиликка асосланган жиззахча ва андижонча тендер ҳақида хабар қилинган эди. Коррупцияга қарши курашиш агентлиги Жиззахдаги ҳолат бўйича текшириш бошланганини маълум қилган. Шунингдек, бир неча кун аввал Хоразмда 20 млрд сўмлик давлат буюртмасини “замҳоким”ининг укасига тегишли компания ютгани хабар қилинди.
