Германия канцлери Ангела Меркель 19 февраль куни Брюссельда бўлиб ўтган Буюк Британиянинг Евроиттифоқдаги тақдири ҳақидаги музокараларнинг танаффус пайтида фаст-фуд билан овқатланишга қарор қилди. Бу ҳақда “Вести” хабар бермоқда.
Таниқли сиёсатчи музокаралардан сўнг режалаштирилган расмий кечки овқатни кутиб ўтиришга тоқат қилмаган. Мазкур кечки таом 20:00 га мўлжалланган эди.
Меркель ўз ёрдамчилари билан Maison Antoine номли кафега йўл олган. Меркель ўзига андалус соусли картошка-фри сотиб олган. Одатда бундай турдаги фаст-фуд помидор, майонез ва мурч билан биргаликда берилади.
Гувоҳлар Германия канцлерининг оддий одамлардек кўчадан фаст-фуд сотиб олиб, еяётганини видео ва фотосуратга тушириб, интернетга жойлаган.
