Жорий йилнинг 7 март санасида россиялик бир қатор спортчилар, жумладан Катта Шлем турнирининг беш карра чемпиони Мария Шарапова ва фигурали учиш бўйича Сочи олимпиадаси чемпиони Екатерина Боброванинг қонидан 2016 йилнинг 1 январидан тақиқланган препарат-мельдоний борлиги аниқланди.
Мария Шарапова 6 март куни тўсатдан матбуот анжумани уюштириб, кенг жамоатчиликни ҳайратга солди. Кўпчилик матбуот анжуманидан ўтказишдан мақсад теннисчи карьерасида бўлиши мумкин бўлган танаффусни эълон қилиш деб ўйлади. Бироқ, матбуот анжуманига олти дақиқага кечикиб келган Мария спорт оламини ҳайратга солди.
“Австралия очиқ чемпионатида ўтказилган допинг-тест ижобий чиқди. Бир неча кун аввал мен бу ҳақда Халқаро теннис федерациясидан хат олдим.
Менинг қонимда мельдоний аниқланди. Мен мазкур препаратни 10 йил давомида қабул қилганман ва у тақиқланмаган эди. 2016 йилнинг 1 январидан бу препарат тақиқланган экан, мен буни билмасдим. Бу менинг хатоим ва бунинг учун жавобгарликни ўз зиммамга оламан. Мен мухлисларим ва оиламга панд бердим. Бунинг оқибати нима билан якунланишини билмайман. Теннисдаги фаолиятимни бундай тарзда якунлашни истамайман. Умид қиламанки, яна теннис мусобақаларида иштирок этиш имкониятига эга бўламан”, — деди Мария Шарапова.
Унинг айтишича, ўтган йилнинг декабрь ойи охирида унга тақиқланган препаратлар рўйхатининг янгиланган кўриниши тақдим этилган. Мария эса рўйхат билан танишиб чиқишни кейинга қолдирган.
Мельдоний (ёки милдронат) — машғулотларда мушаклар толиқишини енгиллаштиради. Уни қабул қилганлик белгилари организмда бир неча кун сақланиб қолади.
Россиянинг футбол бўйича терма жамоаси шифокори Эдуард Безуглов мазкур препаратнинг хусусиятлари ҳақида шундай дейди:
“Бу препарат спортчига оғир жисмоний зўриқишларни бартараф этишга ва организмни кислород етишмовчилигига чидамлилигини ўстиришга ёрдам беради. У таблетка шаклида қабул қилинади ёки венага юборилади. Мельдоний 2016 йилнинг 1 январидан тақиқланган препаратлар рўйхатига киритилгани ҳақида ҳамма спортчилар огоҳлантирилган. Бироқ, айримлар мазкур огоҳлантироиш билан танишиб чиқишга эринчоқлик қилган”.
2014 йилги жуфтлик беллашувларида олимпиада чемпионлари Екатерина Боброва ва Дмитрий Соловьевларнинг қонида ҳам мазкур препарат аниқланди.
Бутунжаҳон антидопинг агентлиги одатда мелдоний қабул қилган спортчиларни тўрт йилга дисквалификация қилади. Бироқ, Россия ОАВларининг хабар беришича, Мария бундай узоқ муддатга дисквалификация қилинмайди. Чунки у ўз айбини тўлиғича тан олди.
Худди шунга ўхшаш ҳолат теннисчи Андре Агасси билан ҳам юз берган эди. 1990 йиллар ўрталарида теннисчининг қонидан олинган намунада ҳам тақиқланган препарат аниқланган эди.
Тушунтириш хатида у ичимлик идишини алмаштириб қўйгани ва бунинг оқибатида ўз физиотерапевтининг ичимлигини ичиб юборганини ёзган эди. Халқаро теннис федерацияси унинг гапларига ишонган ва теннисчи бир ҳафтадан сўнг кортга тушган эди.
Манба: Lenta.ru
