Литванинг Скуодас шаҳрида жойлашган мактаблардан бирида ўтказилган тиббий кўрикдан сўнг 77 нафар ўқувчида сил касаллиги аниқланган, деб хабар берди “Lenta.ru” нашри.
Мактаб ўқувчиларидан икки нафари сил касаллига чалингач, текширувдан ўтказилган ўқитувчи аёл сил касаллигининг очиқ формасига чалинганлиги маълум бўлган. Мамлакат маориф вазири Наталья Истоминанинг маълумот беришича, ўқитувчи аёлнинг саломатлигига беэътиборлиги ҳамда вазифасига совуққонлик билан қараши мактабда сил касаллиги тарқалишига сабаб бўлган.
Ўқитувчи аёл йўтал безовта қилишига қарамай, шифохонага мурожаат қилмаган. Унинг тўхтовсиз йўталишига ҳамкасблари эътибор беришган. Рентгенга тушган аёл анча йиллардан бери сил касаллигига чалингани ва касаллик манбаи айнан у бўлгани маълум бўлган.
