Якшанба куни Туркия пойтахти Анқарада юз берган кучли портлаш оқибатида камида 34 киши ҳалок бўлган.
125 нафар яраланган пойтахт шифохоналарида, улардан 19 кишининг аҳволи жуда оғир дея баҳоланмоқда. Бу рақамлар маҳаллий ҳукумат вакилларининг расмий маълумотлари, дея хабар беради Euronews.
Портлаш кечки соат 7 да Қизилой туманининг Гювен боғи ёнида йирик транспорт узелидан узоқ бўлмаган жойда содир бўлган. Воқеа жойи ёнгинасида Адлия ва Ички ишлар вазирлиги ҳамда Олий суд биноси жойлашган. Ҳудди шу ерда метро, автобус бекати, шунингдек савдо-кўнгилочар мажмуа ҳамда бир нечта банк жойлашган.
Туркия ИИВ хабарларига кўра, миналанган автомобиль бекатда турган рейсдаги автобусга бориб урилган ҳамда портлаб кетган. Портлаш 2,5 километр радиусгача эштилган, у шу қадар кучлилигидан атрофдаги бир нечта автомобиль ёниб кетган.
Воқеа жойига зудлик билан қутқарувчи ва шифокорлар етиб келган. Турк ҳукумати бўлиб ўтган ҳодисани теракт деб атамоқда. Автомобиль худкуш томонидан портлатилган.
Турк ҳукумати Анқарадаги терактни ёритиш бўйича ОАВларга чеклов киритди.
