Ўзбекистон ва Қорақалпоғистон халқ артисти Озодбек Назарбеков жорий йилнинг 8 март куни “Қўқон савдо маркази”да икки сеансда тўлиқ жонли ижродаги концерт дастурини мухлисларга ҳавола этди.
Жонли ижрода сўралган қўшиқларни кетма-кет ижро қилиш осон эмас, албатта. Санъаткорнинг пешона теридан кетма-кет дастрўмоллар хўл бўлиб кетди, деб ёзади “Бекажон” газетаси.
Санъаткор билан қўл бериб кўришиш ва айниқса, бирга суратга тушиш истагида бўлган мухлисларнинг саноғи йўқ эди. Санъаткорни мухлислардан ажратиб олиш осон бўлмади.
Концертдан қанчалик кўнгли тўлгани ҳақидаги саволга санъаткор шундай жавоб берди:
“Менга қолса мухлисларнинг ёнига бориб куйлагим келади. Аммо, бу муаммо! Буни ўзингиз ҳам кўрдингиз. Концерт савдо марказининг ичида бўлганлигининг ўзи ғайриоддий эди! Биринчи марта бундай бўлиши.
Концертнинг икки сеансда жонли ижрода ўтказилганидан, бунинг устига шамоллаганидан санъаткор бошида бироз қийналганини ҳам айтиб ўтди.
“Тўғриси, бошида биринчи сеансда сал қийналдим. Кейин мухлислар, онахонлар кўзларидаги қувончни кўриб, киришиб кетдим. Биласизми, ўзи бундай катта дастур билан жонли ижрода узоқ вақт давомида куйлаш, яқин бир-икки ойда бўлмаган эди. Спортчи машқ қилмай туриб, бирдан рингга чиқса қандай бўлади? Мен учун бугунги концерт шундай бўлди. Лекин жонли ижро учун шароит ўйлаганимдан ҳам аъло чиқди.”
