Путин "Al Journey 2021" танловида иштирок этган ўзбек қизларини алоҳида эътироф этди (видео)

Жорий йилнинг 12 ноябрига қадар Россияда сунъий интеллект борасидаги халқаро конференция доирасида ўтказилган Artificial Intelligence Journey танловининг Data Lady номинациясида Ўзбекистондан қатнашган ўқувчи қизлар ғолиб бўлди. Президент В.Путин ўзбекистонлик ушбу қизларнинг лойиҳалари ҳақида ўзининг ижобий фикрларини билдириб ўтди.

Даставвал қизлар конференция ҳакамлар ҳайъатига ўз лойиҳалари ҳақида тушунтириш берди.

"Биз Тошкентдан келган, 5 кишидан ташкил топган  IT Queens жамоасимиз. Ҳозир сизга олий таълим учун таълим муассаларига кириш имтиҳонларини ташкиллаштиришда қўл келадиган  сохталикни аниқловчи махсус лойиҳа ҳақида гапирмоқчиман",-дейди иштирокчилардан бири.

"Deep fakes- сунъий интеллект ёрдамида синтезланиб яратилган ҳақиқий шаклга эга реал ва сохта фото ва видеоларни аниқловчи махсус дастур. Бу орқали сиз фирибгарлик, шантаж қилиш ҳолатларини аниқлашингиз мумкин бўлади.

Биз ҳаммамиз реал ҳаётда ҳар бир қадамда юзни аниқлашга дуч келамиз. Шу сабабли сохта суратларни аниқлаш қай даражада муҳимлигини тушунамиз. Биламизки, ҳақиқий шаклдаги фотосуратлар ва видеолар асосида сунъий интеллект томонидан яратилган. Бизнинг вазифамиз нейросетга сохта расмларни аниқловчи тизимни ўрнатиш эди. 

Буни амалга ошириш учун бизда реал одамларнинг сохта инъексияланган суратлари бўлади ва тармоқ бу суратлар тўпламига қараб ўз жавобини беради. Яъни биз қайси тасвир ҳақиқий ва қайси бири ҳақиқий эмаслигини била оламиз. Умуман олганда,  расмда сохталикни айнан нима кўрсатаётганини аниқлашга ёрдам берамиз",-дейди қизлардан ташкил топган жамоа аъзолари.

Тошкентлик ёшларнинг чиқишларини тинглаган Путин уларга ўзининг ижобий фикларини билдирди.

"Бу ишланмалар одамлар манфаати учун",-дейди Россия президенти.

"Энг муҳими, қизиқ бўлган ва зарурий ишлар ҳақидаги лойиҳа. Қачонки, замонавий технологиялар ёрдамида инсон ҳуқуқлари бузилганда, одамларнинг манфаатларини ҳимоя қилишнинг ажойиб усули. Айтиб ўтмоқчиманки, агар сиз аниқ йўлдан борадиган бўлсангиз, ҳар қандай таҳдидларга қарамай, тўғри ечимни топишингиз мумкин. Ҳозир, шунчаки, сиз каби ўзбек қизлари борлигидан хурсандман ва катта раҳматлар айтиб, ишларингизда омад тилайман",-дейди Путин.