Бугунги кунда юртимизда олиб борилаётган ва ҳозирда ижроси жадаллик билан таъминланаётган масалалардан бири бу Конституциямизга ўзгартириш киритиш бўйича жамоатчиликнинг ҳамда махсус ишчи гуруҳнинг таклиф ва тавсияларини ўрганиб чиқиш ҳамда жоиз кўрилган таклифлар устида ишлаш бўлиб турибди. Шу ўринда жамоатчиликни қизиқтираётган "Конституцияга ўзгартириш киритишга эҳтиёж борми?" деган саволга юридик фанлари доктори, ТДЮУ профессори Ихтиёр Беков қуйидагича жавоб берди:
— Конституциямизнинг шу пайтгача бўлган ривожланиш даврига эътибор берадиган бўлсак, бундан олдин ҳам бир неча маротаба ўзгартириш ва қўшимчалар киритилган. Уларни таҳлил қилсак, асосан, давлат ҳокимиятини ташкил этиш билан боғлиқ масалада ислоҳотлар амалга оширилган. Инсон ҳуқуқлари билан боғлиқ бўлган нормаларни, қўшимчаларни кўрадиган бўлсак, бор-йўғи бир маротаба, яъни 32-моддада жамоатчилик назорати билан боғлиқ бўлган жойга ўзгартириш киритилган. Демак, шунинг ўзи ҳам кўрсатиб турибдики, бугунги кунда бизда асосий масала коинсон ва унинг қадри бўлар экан, биз буни конституциявий жиҳатдан ҳам мустаҳкамлашимиз, ҳам кафолатлашимиз керак!
