Америкалик қўшиқчи Селена Гомес ноқонуний муҳожирларнинг депортация қилинишига қарши чиқиб, ижтимоий тармоқларда ўз муносабатини билдирганидан сўнг унга нисбатан депортация таҳдидлари пайдо бўлди, дея ёзмоқда zamon.uz.
Гомес ўзининг Инстаграм саҳифасида кўз ёшларини тия олмаган ҳолда мексикалик муҳожирларни қўллаб-қувватловчи видео жойлаганди. Видеода у АҚШ президенти Доналд Трампнинг ноқонуний муҳожирларни депортация қилиш бўйича қабул қилган қароридан чуқур қайғуда эканини билдирган.
Мазкур чиқишидан сўнг, Гомесга қарши танқидий фикрлар билдирилди. АҚШ сенатига номзод Сем Паркер Х ижтимоий тармоғида эълон қилган постида қўшиқчини "Америка фуқаролигини қадрламасликда" айблаб, унинг депортация қилиниши кераклиги ҳақида баёнот берди.
Эслатиб ўтамиз, Селена Гомеснинг отаси мексикалик. Унинг бувиси ва бобоси 1970 йилларда Мексиканинг Монтеррей шаҳридан АҚШга муҳожир сифатида келган.
