АҚШ президенти Барак Обама Оқ уйдан кетганидан кейин шахсий медиакомпания очишни режалаштирди, деб хабар берди “Lenta.ru” нашри.
Барак Обама Netflix видеоканалидаги шоуда қатнашишни ёки комедия сайтидаги сериалда иштирок этишни, шу билан бирга шахсий медиакомпаниясини очишни мақсад қилган. Ўз режаларини муҳокама қилиш учун у Facebook асосчиси Марк Цукерберг билан ҳам учрашган.
Оқ уйнинг коммуникация бўйича директори Жен Псаки бу маълумотларни расман инкор этиб, шундай деди: “Барак Обама ёшлар билан ишлашни, ахборот узатиш усуллари, тизимини ўзгартиришни истайди. Бу дегани унинг вазифасидан озод бўлгандан кейин медиабизнес билан шуғулланади, дегани эмас”.
Барак Обама 2017 йилнинг январь ойида АҚШ президентлиги вазифасини Дональд Трампга топширади. У қизи Саша мактабни битиргунча, Вашингтонда, кейинчалик ўзи ва рафиқаси туғилиб ўсган Гавайи ёки Чикагода яшашини маълум қилди.
