Америкалик хонанда Жеки Иванко президент инаугурациясида давлат мадҳиясини ижро этувчи энг ёш ижрочи бўлади, деб хабар берди “Тvzvezda.ru” нашри.
Қиз эндигина 16 ёшга тўлганига қарамай, “Америка истеъдодларни излайди” (America's Got Talent) шоусидаги чиқиши билан томошабинлар қалбидан жой эгаллашга улгурган.
Ёш хонанда 2017 йилнинг 20 январида АҚШнинг 45 президенти Дональд Трампнинг инаугурацияси муносабати билан ўтказиладиган тантанали маросимда қатнашиш учун расмий таклифнома олганлигини маълум қилди.
“Мен яна президент қаршисида куйлашим мумкинлигидан жуда ҳаяжонланяпман. Бундай имкониятга эга бўлиш буюк бахтдир!”, дейди Жеки.
Иванка илк маротаба 10 ёшда эканлигида танилган, телешоудаги муваффақиятли иштирокидан кейин у 2010 йилда президент қаршисида куйлашга таклиф этилган эди. Ўшанда қиз Вашингтонда Оқ уй қаршисида қад ростлаган Миллий рождество арчаси ёнида куйлаганди.
