Ислом Каримов номидаги Тошкент халқаро аэропортида учиб келиш зали реконструкциясининг биринчи босқичи якунланди ва залнинг янгиланган ўнг қисми фойдаланишга топширилди. Бу ҳақда Uzbekistan Airports хабар қилди.
Залнинг умумий майдони кенгайтирилди, автотранспорт ва автобуслар учун янги йўлак қурилди, 120 ўринли автотураргоҳ ташкил этилди ва яшил ҳудуд барпо этилди.
Бино фасадининг кенгайиши учиб келиш зали майдонини 2100 кв метрга ошириш имконини берди. Натижада божхона ҳудуди кенгайтирилди, қўшимча юк карусели ўрнатилди, терминал ичида кутиб олувчилар учун илк бор 120 ўриндиқли ҳудуд ташкил этилди.
Кутиб олувчилар майдонидан ташқари, қисқа муддатли тўхташ учун залга туташган махсус ажратилган йўлак очилди. Энди зал олдига таксида ҳам, шахсий автомобилларда ва автобусларда ҳам кириш мумкин — йўлакда туриш вақти жўнаб кетиш залидаги йўлак каби 10 дақиқани ташкил этади.
Реконструкциянинг иккинчи босқичини 2025 йил охиригача якунлаш режалаштирилган. Унинг давомида қўшимча юк ташиш камарини ўрнатиш, кафелар, дўконлар ва бошқа хизматлар жойлашган кутиб олувчилар ҳудудини кенгайтириш назарда тутилган.
"Бугун терминалнинг ўнг қисмини кенгайтириш ишлари якунланди. Чап қисмини реконструкция қилиш эртадан бошланади. Аэропорт фаолиятини тўхтата олмаганимиз учун босқичма-босқич ишларни амалга оширишни режалаштирганмиз. Ноябрдан июнгача об-ҳаво шароити ва йўловчилар оқими юқори (кунига 200 тагача рейс) бўлишига қарамай қурилиш ишлари узлуксиз амалга оширилди. Вақтинчалик ноқулайликлар учун йўловчилардан узр сўраймиз ва сабр-тоқат учун миннатдорчилик билдирамиз. Ишларимиз натижаси пойтахтнинг барча меҳмонларини хурсанд қилишига ишонамиз", — дея хабар берди Uzbekistan Airports қурилиш бошқармаси мутасаддилари.
Якуний босқич — келиш ва жўнаш залларини ягона терминал мажмуасига бирлаштириш. Ишлар якунлангач, терминалнинг умумий майдони 10 000 кв метрдан ошади, ўтказиш қобилияти эса соатига 2400 йўловчига етказилади.
