Бугун, 29 сентябрь куни Тошкент шаҳар Учтепа тумани жиноят судида диний блогер ва “Азон Global” портали асосчиси Мубашшир Аҳмад (асл исми Алишер Турсунов)нинг навбатдаги суд мажлиси бўлиб ўтиши керак эди. Бироқ, бу мажлис яна бошқа кунга – 2 октябрь, соат 16:00 га қолдирилди. Бу ҳақда “Азон Global” портали хабар берди.
Суд мажлисининг нега қолдирилгани юзасидан расмий изоҳ берилганича йўқ. Бу эса суд жараёнининг навбатдаги кечиктирилиши бўлиб, Турсуновнинг иши бўйича бундай ҳолат биринчи марта кузатилмаяпти.
Маълумот учун, унга Жиноят кодексининг 244-1-моддаси (жамоат хавфсизлигига таҳдид солувчи материаллар билан ишлаш) ва 244-3-моддаси (диний материалларни қонунга хилоф тарзда тарқатиш) бўйича айбловлар қўйилган ва у қамоққа олинган.
Аввалроқ, 18 сентябрь куни бўлиб ўтган суд мажлисида давлат айбловчиси Мубашшир Аҳмадга 7 йил озодликдан маҳрум этиш жазосини сўраганди. Суд жараёнлари давом этмоқда.
