2025 йил 24 сентябрда Тошкент вилоятининг бир неча туманидаги давлат боғчаларда икки мингга яқин бола оммавий заҳарланганди. 30 сентябрь соат 14:00 ҳолатига кўра, шифохонага ётқизилган болаларнинг асосий қисми тўлиқ соғайиб, оилалари бағрига қайтган. Бу ҳақда Санэпидқўмита раисининг биринчи ўринбосари Нурмат Отабеков маълум қилди.
“Ҳозирги вақтда фақат уч нафар тарбияланувчи шифокорлар назоратида қолмоқда. Улар асосий ҳолатдан тўлиқ соғайган бўлиб, даволаш жараёнида уларда олдиндан мавжуд касалликлар аниқлангани сабабли, қўшимча тиббий кузатув остида қолдирилган. Бу болаларнинг ҳам аҳволи барқарор ва яқин кунларда уйларига жавоб берилади”, деган қўмита масъули.
Шу билан бирга, Мактабгача ва мактаб таълими вазирлиги ҳам ҳолат юзасидан баёнот берди. Вазирлик даволаш жараёнлари шифокорлар назоратида самарали ташкил этилгани ва болалар ўз оилалари бағрига қайтганини билдирган.
“2 октябрдан бошлаб барча мактабгача таълим муассасалари ўз фаолиятини одатий иш режимида давом эттиради. Амалдаги қонунчиликка мувофиқ, айрим боғчаларимизда умумий овқатланиш хизматлари хусусий корхоналар томонидан аутсорсинг тизими орқали йўлга қўйилган. Шартномаларда санитария талаблари ва меъёрларига қатъий риоя қилиш белгиланган. Шу билан бирга, Вазирлик ўз масъулиятини чуқур ҳис қилади ва назорат механизмларини янада кучайтиради”, дейилади манбада.
Вазирлик ҳуқуқни муҳофаза қилувчи идоралар ва Соғлиқни сақлаш вазирлиги билан ҳамкорликда воқеа тафсилотлари ҳар томонлама ўрганилаётганини қайд этган. Камчиликлар аниқланса, тегишли шартномалар қайта кўриб чиқилиши ёки бекор қилиниши маълум қилинган.
“Жойларда кўрсатилаётган аутсорсинг хизматлари сифати устидан назорат тизими янада кучайтирилади. Бу жараёнга ота-оналар, экспертлар ва журналистлардан иборат жамоатчилик комиссияси ҳам жалб этилиб, уларнинг хулосалари жамоатчиликка мунтазам етказиб борилади”, дейилади вазирлик баёнотида.
Бундан аввал Нурмат Отабеков жами 1 922 нафар бола, жумладан, беморлар билан мулоқотда бўлганлар ҳам тиббий кўрикдан ўтказилганини ма ълум қилганди. Улардан 959 нафарида клиник белгилар кузатилмагани сабабли уйларига жавоб берилган. Кейинги давр мобайнида яна 269 нафар бола соғайиб, уйига қайтарилган.
Тошкент вилоятининг бир қатор боғчаларида болалар заҳарланиши билан боғлиқ ҳолат юзасидан 7 киши қамоққа олинган. Уларнинг 2 нафари болалар заҳарланишига сабаб бўлган маҳсулот ишлаб чиқарувчилари бўлса, қолганлари аутсорсинг билан шуғулланган компания вакиллари.
Олий Мажлис Қонунчилик палатаси депутати Наримон Умаров ушбу воқеа юзасидан бош прокурорга депутатлик сўрови жўнатганди.
