Жорий йил сентябрда Ўзбекистонда 80,5 миллиард сўмлик газ ва электр энергияси талон-торож қилинди. Бу ҳақда Ўзэнергоинспекция хабар берди.
Ўтган ойда инспекция ўтказган назорат тадбирларида истеъмолчилар томонидан энергия ресурсларидан ноқонуний фойдаланилган 219 та ҳолат аниқланган.
“Унга кўра, 33,6 миллион кВт/соат электр энергияси (52 миллиард сўм) ва 9,4 миллион метр куб табиий газ (28,3 миллиард сўм) талон-торож қилинган. Дастлабки ҳисоб-китобларга кўра, 80 миллиард 473 миллион сўм зарар қайта ҳисоб-китоб қилинди”, дейилади вазирлик хабарида.
Шу билан бирга, истеъмолчилар томонидан энергия ресурсларидан фойдаланиш қоидаларини бузиш билан боғлиқ ҳуқуқбузарлик бўйича 546 та маъмурий иш расмийлаштирилган.
Қоидабузар истеъмолчиларга нисбатан белгиланган тартибда чора кўриш учун тегишли ҳужжатлар ҳуқуқни муҳофаза этувчи органларга тақдим қилинган.
