Саида Мирзиёева Telegram-kanali орқали маълум қилишича, у Қорақалпоғистондаги умуммиллий “Саломатлик марафони” доирасида ташкил этилган чора-тадбирларда иштирок этди. Марафон доирасида Нукус шаҳридаги 12 та оилавий поликлиника ҳамда 3 та жамоат масканларида аҳоли профилактик кўрикдан ўтказилмоқда. Шу билан бирга, беморларни йўналтириш ва рақамлаштириш тизими жорий этилган.
“AI TOP-3 CDSS, MuxlisaMED AI, AI Mammo каби сунъий интеллект ечимлари орқали тиббий хизмат янада самарали ва тезкор бўлмоқда”, — дея таъкидлади Мирзиёева.
Маълумотларга кўра, тўрт кун ичида 12 мингга яқин фуқаро кўрикдан ўтган, улардан 1 700 нафари чуқур текширувга жалб қилинган ва 116 киши даволанишга йўналтирилган.
Саида Мирзиёева Қорақалпоғистон тиббиёт институти болалар жарроҳлиги бўлимида кичик беморлар билан учрашиб, уларнинг жасоратидан катта таассурот олганини билдирган. Шунингдек, ҳудудда “Оилавий саломатлик мактаби” ва “Саломатлик волонтёрлари” каби янги лойиҳалар амалга оширилмоқда.
“Миллат саломатлиги – бу барчамиз елкама-елка босиб ўтадиган умумий йўлимиз ва масъулиятимиздир”, — деб ёзади Мирзиёева.
