Қорақалпоғистонга хос машҳур таом — “Балиқ қарма” энди расмий равишда географик кўрсаткич сифатида давлат рўйхатига олинди. Бу ҳақда Адлия вазирлиги хабар берди.
Эндиликда бу ном ва унинг анъанавий тайёрлаш технологияси ҳуқуқий жиҳатдан ҳимояланади, сифати кафолатланади ва Қорақалпоғистоннинг гастробренди сифатида тарғиб этилади.
Мазкур таом Оролбўйи ҳудудларига хос балиқчилик анъаналари асосида шаклланган. “Балиқ қарма” таркибида пиширилган балиқ, шўрва, майда туғралган сабзавотлар ва 1×1 дан 2×2 см гача бўлган қуритилган хамир бўлаклари мавжуд. Шўрванинг устки ёғи майда тўғралган пиёзга қуйилади — бу таомга ўзига хос таъм ва ҳид беради.
Маълумот учун, географик кўрсаткич — маҳсулотнинг айнан маълум ҳудудга хослиги, сифати ва машҳурлиги ўша жойнинг табиий, тарихий ёки инсон омиллари билан боғлиқлигини ифода этади.
Эслатиб ўтамиз, аввалроқ “Самарканд нони”, “Ғиждувон шашлиги”, “Хоразм тухумбарагиси” ва бошқа бир қатор таом ва буюмлар ҳам географик кўрсаткич сифатида рўйхатга олинган эди.
