Наманганда ноқонуний дори воситалари айланмасига қарши курашиш йўналишида ўтказилган тезкор тадбир чоғида қалбаки дори ишлаб чиқариш цехи аниқланди.
Маълумотларга кўра, биологик фаол қўшимчалар ишлаб чиқариш билан шуғулланувчи МЧЖ раҳбари санитария талабларига жавоб бермайдиган жойда дори воситаларини қўлбола усулда тайёрлаб келган.
Тадбир давомида умумий қиймати 30 миллиард сўм бўлган 9 турдаги дори воситалари, прекурсорлар, ишлаб чиқариш ускуналари ва этикеткалар ашёвий далил сифатида олинди.
Қалбаки дорилар оригинал маҳсулотларга ўхшатиб “Пивовит” (Пиковит), “Канасерон” (Канефрон), “Эспуметик” (Эспумизан) каби номларда ишлаб чиқарилгани аниқланди.
Ҳозирда экспертиза ва суриштирув ишлари олиб борилмоқда. Расмийларга кўра, бундай дори воситаларини сотиш инсон соғлигига жиддий хавф туғдиради ва қонун олдида жавобгарликка сабаб бўлади.
