Ўзбекистонлик шахматчи Нодирбек Абдусатторов блиц рейтинг бўйича жаҳоннинг энг кучли учталигидан жой олди.
У сўнгги турнирлардаги муваффақиятли иштироклари эвазига икки поғона юқорилаб, жаҳон рейтингида 3-ўринга кўтарилди.
Ҳозирги рейтингга кўра, норвегиялик Магнус Карлсен 2877,4 очко билан биринчи, америкалик Ҳикару Накамура 2838 очко билан иккинчи ўринни эгаллаган. Абдусатторов эса 2802,5 очко билан кучли учликни якунламоқда.
Шу тариқа, 21 ёшли гроссмейстер блиц йўналишида дунё шахмати элитаси қаторидаги мавқеини янада мустаҳкамлади.
Маълумот учун, Нодирбек Абдусатторов шу йил феврал ойида Германиянинг Вайссенхаус курортида ўтган фристайл-шахмат бўйича FIDE жаҳон чемпионатида бронза медалини қўлга киритган ва 2027 йилда бўлиб ўтадиган жаҳон чемпионатига йўлланмани расман расмийлаштирган эди.
