Давлат хавфсизлик хизмати ва ҳуқуқни муҳофаза қилувчи идоралар томонидан ўтказилган тезкор тадбирларда ер майдонларини пул эвазига расмийлаштириб беришни ваъда қилган шахслар фош этилди.
Самарқанд вилоятининг Оқдарё туманидаги фермер хўжалиги раҳбари 3 гектар ерни иссиқхона ташкил этмоқчи бўлган фуқарога расмийлаштириб бериш эвазига 300 минг АҚШ доллари талаб қилган. У олдиндан 20 минг доллар олган вақтида ашёвий далиллар билан ушланган.
Қашқадарё вилоятида эса икки нафар шахс давлат захирасидан 8 сотих ерни “мансабдор танишлари орқали” олиб беришни ваъда қилиб, 180 миллион сўм талаб қилган. Улар олдиндан 10 минг доллар олган пайтда қўлга олинган.
Ҳар икки ҳолат бўйича Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Расмий идоралар фуқароларни ер майдонларини қонунга зид равишда сотиб олиш ёки сотиш ҳолатларидан тийилишга чақирмоқда.
