Пойтахтда ҳавонинг сифати доимий назорат остида. Экология ва иқлим ўзгариши миллий қўмитаси маълум қилишича, пойтахтнинг барча туманларида 24 соат давомида мобил экологик лабораториялар орқали ҳаво ифлосланиши мониторинг қилинмоқда.
Ушбу лабораториялар "Атроф-муҳитни муҳофаза қилиш соҳасида ихтисослашган таҳлилий назорат маркази" томонидан ташкил этилган бўлиб, масалан, Юнусобод туманидаги "Туркистон" метро бекати атрофидаги ҳудуд доимий кузатув остида.
Қўмита, ҳавонинг сифатини яхшилаш мақсадида тезкор штаб ташкил қилган. Тегишли идоралар билан ҳамкорликда у экологик вазиятни назорат қилиб, аниқланган ифлосланиш манбаларини белгиланган тартибда тегишли ташкилотларга йўналтирмоқда ва зарур чораларни кўрмоқда.
Бу чоралар Тошкент шаҳридаги ҳавони янада тоза ва хавфсиз қилишга қаратилган доимий мониторинг тизимининг муҳим қисми сифатида баҳоланмоқда.
