Ўзбекистонда ҳаво сифати яқин 10 кун давомида ёмонлашиши мумкин. Бунга совуқ антициклон кучайиши ва узоқ муддатли инверсия сабаб бўлмоқда.
"Ўзгидромет"нинг маълум қилишича, 29 ноябрдан бошлаб антициклон таъсири янада кучайиб, атмосфера босими кўтарилади, ҳаво ҳарорати эса пасаяди. Тунлари совуқ, кундузи эса нисбатан илиқ ҳаво кузатилиши мумкин.
Табиатдаги бундай тинч ва совуқ антициклон даврларида эрталабки қуюқ туман тушиши, ҳавода чанг ва тутун миқдори ортиши табиий ҳол, дея қайд этди мутахассислар.
Инверсия жараёнлари камида 5 декабргача давом этиши кутилмоқда. Шу даврда майда муаллақ заррачалар — PM консентрацияси ошиши мумкин, бу эса ҳаво сифатини сезиларли ёмонлаштиради.
Мутахассислар аввалроқ 24 ноябрь куни ҳаво яхшиланиши кутилганини эслатиб, аммо янгиланган прогнозга кўра инверсия 29 ноябрдан кейин ҳам сақланиб қолиши мумкинлигини билдирди.
