Ўзбекистонда 2026 йил 1 январдан бошлаб давлат бошқарувини рақамли трансформация қилиш ва унинг самарадорлигини оширишга қаратилган "Бюрократик тўсиқларни бартараф этиш - 2030" дастури ишга туширилади.
Қуйидагилар Дастурнинг асосий вазифалари этиб белгиланди:
• давлат хизматларидан тез ва қулай фойдаланиш орқали фуқароларнинг ҳаёт сифатини ошириш;
• тадбиркорликни рағбатлантириш ва мамлакатнинг инвестициявий жозибадорлигини ошириш;
• рақамли ва давлат бошқаруви соҳасида Ўзбекистоннинг ижобий халқаро имижини шакллантириш;
• ортиқча тартиб-қоидаларни бартараф этиш ва жараёнларнинг шаффофлигини ошириш орқали суиистеъмолчилик хавфини камайтириш.
Дастур ижросини мувофиқлаштириш учун Стратегик ривожланиш ва ислоҳотлар агентлиги ҳузурида Лойиҳа офиси ташкил этилади.
Бюрократияни бартараф этиш бўйича таклифларни ишлаб чиқиш ва кўриб чиқиш, шунингдек, амалга оширилган ишлар самарадорлигини баҳолаш агентлик оператори ва эгаси бўлган Zero Bureaucracy рақамли платформаси орқали амалга оширилади.
Фармойиш ижросини назорат қилиш, шунингдек, масъул ташкилотлар фаолиятини мувофиқлаштириш президентнинг стратегик ривожланиш масалалари бўйича маслаҳатчиси Сардор Умурзоқов зиммасига юклатилди.
