30 ноябрь куни Қирғизистонда бўлиб ўтган муддатидан олдин парламент сайловларида Жапаров тарафдорлари устунлик қилди. Марказий сайлов комиссияси маълумотларига кўра, 90 ўриндан камида 50 таси аввалги чақириқ депутатларига насиб қилиши мумкин.
Сайловчилар фаоллиги эса маҳаллий вақт билан 19:00 га келиб 34 фоиздан ошди. Янги сайлов тизими қонунчиликка 2025 йил июнда киритилган ўзгаришлар асосида илк бор қўлланилди.
Унга кўра, мамлакат 30 та округка бўлинган бўлиб, ҳар бир округдан учта депутат сайланади ва улардан камида бири аёл бўлиши шарт.
Сайловларга бир ҳафта қолганда бир қатор мухолифат вакиллари, жумладан, собиқ президент Алмазбек Атамбаевнинг ўғли ҳамда Социал-демократлар партияси аъзолари ҳибсга олингани мамлакатда сиёсий вазият кескинлашганини кўрсатди.
Расмийларга кўра, улар сайлов натижалари эълон қилинганидан кейин оммавий норозилик ташкил қилишни режалаштирган.
