Қўшма Штатлар Венесуэлага иккинчи зарбалар тўлқинига тайёр бўлган, аммо бунга ҳожат йўқлигини Трамп таъкидлади.
“Биз зарбаларнинг иккинчи тўлқинига тайёр эдик. Барча нарса тайёр эди, лекин биринчи тўлқин шунчалик кучли бўлдики, қўшимча зарбага эҳтиёж йўқ эди. Лекин биз тайёрмиз. У ерда ҳеч ким кўрмаган армада мавжуд”, — дейди Президент.
Трамп шунингдек, Венесуэланинг сиёсий келажаги бўйича қарорлар қабул қилинаётганини ва АҚШ бу жараёнда фаол иштирок этишини айтди.
“Биз бошқа бировнинг ҳокимиятни эгаллашига йўл қўйиб, Мадуро қолдирган меросни давом эттиришига йўл қўя олмаймиз. Биз одамларга эркинлик беришни хоҳлаймиз”, — дея қўшимча қилди.
Президент АҚШнинг Венесуэла нефть саноатида фаол бўлишини кутаётганини, шунингдек, Хитойга нефть етказиб бериш давом этишини билдирди.
“Мен Президент Си Сзинпин билан яхши муносабатдаман, муаммо бўлмайди. Улар ўз нефтларини олади”, — дейди Трамп.
Маълумот учун, АҚШ Бош прокурори Венесуэла Президенти Николас Мадуро ва унинг рафиқаси Силия Флоресга “наркотерроризм”, қурол сақлаш ва гиёҳванд моддалар контрабандаси бўйича айбловлар қўйилганини маълум қилган. Расмий Москва АҚШни уларни озод қилишга чақирмоқда.
Эслатиб ўтамиз, 3 январь куни Каракасда бир нечта портлашлар содир бўлган, мамлакатда фавқулодда ҳолат эълон қилинган ва Мадуро миллий кучларни сафарбар қилган.
Кейинчалик Трамп Венесуэлага зарба берилгани ва Мадуро рафиқаси билан бирга қўлга олингани ҳақида баёнот берган.
