Унинг айтишича, минтақа томон “бутун бир армия” йўл олган.
“Axios” нашрига берган интервьюсида Трамп АҚШ Ҳарбий-денгиз кучларининг иккинчи авиация зарба гуруҳини Эрон томон йўналтириш масаласи кўриб чиқилаётганини айтган. Унинг таъкидлашича, Вашингтон яқин вақт ичида Эрон билан келишувга эришишга интилмоқда, акс ҳолда “жуда қаттиқ чоралар” кўрилиши мумкин.
Маълум қилинишича, 6 февраль куни Уммонда Эрон ва АҚШ ўртасида билвосита музокаралар бошланган. Америка делегацияси Теҳрондан ядро дастури, ракета арсенали ва минтақадаги прокси кучларни қўллаб-қувватлаш масалалари бўйича ён беришни талаб қилган.
Эрон эса санкциялар бекор қилиниши шарти билан ядро битимини қайта муҳокама қилишга тайёрлигини билдирган. Шу билан бирга, Теҳрон тинч мақсадларда уран бойитишни давом эттиришини маълум қилган.
Аввалроқ Трамп Эрон 2015 йилги ядро келишувини қайта тузишга рози бўлмаса, ҳарбий чоралар кўрилиши мумкинлигини бир неча бор таъкидлаган эди.
