Ижтимоий тармоқларда тарқалган видео юзасидан бир гуруҳ ёшнинг шахси аниқланиб, уларга нисбатан қонунчиликда белгиланган тартибда чора кўрилди. Бу ҳақда Тошкент шаҳар Ички ишлар бош бошқармаси Йўл ҳаракати хавфсизлиги бошқармаси Ахборот хизмати хабар берди.
Қайд этилишича, ҳудудий Йўл-патруль хизмати ходимлари иштирокчилар билан профилактик суҳбат ўтказган ва уларга йўл ҳаракати қоидалари талаблари тушунтирилган.
Хусусан, ҳуқуқни муҳофаза қилувчи орган вакили ёшларнинг олд ғилдирагини кўтариб ҳаракатлангани ҳамда бир томонлама ҳаракатланиш белгиланган йўлга қарши йўналишда юрганини танқид қилди.
"Шундай ҳаракатланиш мумкинми, олд ғилдирагини кўтариб? Агар қарши томондан келаётган автомобиль уриб юборса, йўл-транспорт ҳодисаси учун ким жавоб беради? Самокат ва скутерлар иштирокидаги йўл-транспорт ҳодисаларини кўряпсиз. Улар орасида ўлим ва оғир оқибатларга олиб келган ҳолатлар ҳам бор. Олд ғилдиракни кўтариб ҳаракатланаётганда бошингиз билан йиқилиб, жароҳат олсангиз, нима бўлади? Яна бир томонлама ҳаракатланиш белгиланган йўлга қарши йўналишда келяпсиз. Бунинг қоидабузарлик эканини биласизми?" дейди ЙПХ ходими.
