Бирлашган Миллатлар Ташкилоти маълумотига кўра, Ливанда бир ҳафта ичида қарийб 700 минг киши ўз уйини тарк этган. Сўнгги 24 соат ичида эса 100 мингдан ортиқ одам кўчишга мажбур бўлган.
БМТ Қочқинлар бўйича Олий комиссарлигининг Ливандаги вакили Каролина Линдхолм Биллинг маълум қилишича, мамлакат бўйлаб 667 мингдан ортиқ киши кўчирилган сифатида рўйхатга олинган.
Унинг айтишича, Isroil Mudofaa kuchlari томонидан амалга оширилган ҳаво ҳужумлари ва қатор ҳудудларда эълон қилинган оммавий эвакуация огоҳлантиришлари минглаб оилаларни қисқа вақт ичида уйларини тарк этишга мажбур қилган.
Кўчирилганларнинг аксарияти Байрут, Ливан тоғлари, шимолий ҳудудлар ва Бекаа водийсида вақтинчалик бошпана изламоқда. Ҳозирда 120 мингга яқин киши ҳукумат томонидан ташкил этилган жамоавий бошпаналарда яшамоқда, қолганлар эса қариндошлари ёки дўстларининг уйида турибди.
БМТ маълумотига кўра, можаро бошланганидан буён 78 мингдан ортиқ суриялик Ливандан Сурияга қайтган, шунингдек 7,7 мингдан ортиқ ливанлик ҳам Сурия ҳудудига ўтган.
Ливан расмийлари 2 мартдан буён Исроил ҳужумлари оқибатида камида 486 киши ҳалок бўлганини, 1313 киши эса жароҳатланганини билдирган. UNICEF маълумотига кўра, ҳалок бўлганлар орасида камида 84 нафар бола бор.
БМТ мамлакатдаги гуманитар вазият тобора оғирлашаётганини таъкидлаб, халқаро ҳамжамиятни Ливанга тезкор ёрдам кўрсатишга чақирган.
