Португалия футбол федерацияси Криштиану Роналдуни ўтган ой терма жамоа йиғинини тарк этгани учун 30 кунга дисквалификация қилди ва 255 евро жаримага тортди. Бу ҳақда BBC хабар берди.
41 ёшли футболчи сентябрь ойида Миллатлар лигаси доирасида Норвегияга қарши ўйинда захирада қолдирилганидан кейин терма жамоа йиғинини тарк этган. Кейинчалик у 1 октябрь куни Данияга қарши баҳсда ҳам асосий таркибда майдонга тушмаслигини билган.
Роналду баёнотида Португалия бош мураббийи Жорже Жезуш икки марта берган ваъдасини бузганини айтган. У буни ишончга жиддий путур етказиш деб баҳолаган.
Футболчининг дисквалификацияси Данияга қарши ўйин ўтказилган кундан бошлаб ҳисобланади. Шу сабабли у жазонинг 19 кунини ўтаб бўлган ва Португалия терма жамоасининг бирорта ҳам ўйинини ўтказиб юбормайди.
Португалия 14 ноябрь куни Миллатлар лигаси доирасида Данияга қарши яна майдонга тушади. Уч кундан кейин эса Уэльс терма жамоаси билан ўйнайди.
Футбол федерациясининг интизом қўмитаси жазо тайинлашда Роналдунинг ўз хатти-ҳаракатидан афсусдалигини билдиргани, футбол ривожига қўшган ҳиссаси ва спортдаги ютуқларини ҳам инобатга олган. Шунингдек, футболчи ўз ҳимояси учун мукофотлари ва эришган натижалари кўрсатилган таржимаи ҳолини тақдим этган.
Роналду аввалги баёнотида қилган иши учун жавобгарликни ўз зиммасига олишини билдириб, жамоадошлари ва мухлисларидан узр сўраган. Шу билан бирга, жазога лойиқ эканини тан олган.
Португалия терма жамоаси бош мураббийи Жорже Жезуш Роналду билан келишув бўлганини рад этган, бироқ унинг терма жамоага қайтиши учун имконият қолдирган.
Португалия футбол федерацияси президенти Педру Проэнса эса Record нашрига берган интервьюсида вазият ҳал этилганидан кейин Роналдунинг терма жамоага қайтишини исташларини билдирган.
