Давлат раҳбарининг таъкидлашича, Янги Тошкент замонавий бизнес, таълим, тиббиёт, туризм ва хизмат кўрсатиш соҳаларини ўзига жалб этадиган мустақил иқтисодий марказга айланиши керак. Бироқ ҳозиргача ажратилган ер майдонларининг учдан икки қисми уй-жой лойиҳаларига тўғри келмоқда.
Шунингдек, инвесторларга ажратилган 28 та лотда қурилиш ишлари бошланмаган. Президент бу ҳолатни тадбиркорларда маблағ ёки хоҳиш йўқлиги билан изоҳлаш тўғри эмаслигини айтди. Унинг қайд этишича, эскича талаблар, рухсат бериш жараёнларининг чўзилиши ва айрим идораларнинг ҳамкорлик қилиш ўрнига назоратчи сифатида иш тутиши лойиҳаларга тўсқинлик қилмоқда.
"Инвестор эса кутмайди. У кўмак ва кафолатни ҳис қилмаса, маблағини бошқа бозорга йўналтиради", — деди давлат раҳбари.
Шу муносабат билан тадбиркорларга ер ажратишдан тортиб, лойиҳани ишга туширишгача бўлган жараённи қайта кўриб чиқиш зарурлиги таъкидланди.
Маълум қилинишича, Янги Тошкентда ерга бўлган талаб ортиб бормоқда. Агар 2024 йилда бир гектар ернинг ўртача қиймати 10 миллиард сўмга ҳам етмаган бўлса, ҳозир бу кўрсаткич 19 миллиард сўмга етган.
