Исроил Бош вазири Биньямин Нетаньяху мамлакат АҚШнинг молиявий ёрдамисиз ҳам барқарор фаолият юритишга тайёр эканини маълум қилди. Бу ҳақда Zamon.uz хабар берди.
Нетаньяху 1 июль куни бўлиб ўтган матбуот анжуманида Исроил иқтисодиёти етарлича мустаҳкамланганини ва энди Вашингтон томонидан ажратиладиган молиявий кўмакка эҳтиёж қолмаганини айтган.
Унинг сўзларига кўра, ҳукумат Америка молиявий ёрдамини босқичма-босқич тўхтатиш жараёнини имкони қадар тезроқ бошлашни режалаштирмоқда.
“Мен Америка ёрдамини тўхтатмоқчиман. Бу ижтимоий ёрдамга ўхшайди ва биз энди бунга муҳтож эмасмиз”, — деган Исроил Бош вазири.
Нетаньяхунинг таъкидлашича, Исроил иқтисодиёти энди кичик иқтисодиёт эмас ва мамлакат АҚШ томонидан ажратилаётган маблағлар ўрнини мустақил равишда қоплаш имкониятига эга.
Матбуот анжуманида у минтақавий хавфсизлик масалаларига ҳам тўхталиб, Исроил Фаластин давлатининг ташкил этилишига қарши эканини яна бир бор билдирган. Шунингдек, у Эрон билан боғлиқ вазият кескинлашган тақдирда Исроил яна ҳарбий чоралар кўришга тайёрлигини айтган.
Бундан ташқари, Нетаньяхунинг билдиришича, Ҳизбуллоҳ таҳдиди сақланиб қолаётган экан, Исроил қўшинлари Ливан ҳудудидаги ўз позицияларини тарк этмайди.
