Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев ҳарбий кадрлар тайёрлаш тизимини такомиллаштириш ва армияни рақамлаштиришга оид тақдимот билан танишди.
Тақдимотда сўнгги йилларда дунёдаги қуролли можароларда учувчисиз учадиган аппаратлар, роботлашган тизимлар, радиоэлектрон кураш воситалари ҳамда замонавий бошқарув технологиялари кенг қўлланаётгани қайд этилди. Шу муносабат билан армияни модернизация қилиш билан бир қаторда янги авлод ҳарбий мутахассисларини тайёрлаш масаласига алоҳида эътибор қаратилмоқда.
Маълум қилинишича, Президент армияни рақамлаштириш ва сунъий интеллектни жорий этиш бўйича топшириқлар бердиШунингдек, ягона вертикал бошқарув тизими яратилиб, Ўзбекистон Республикаси Ҳарбий хавфсизлик ва мудофаа университети ташкил этилган.
Эндиликда ҳарбий таълим жараёни замонавий жанговар ҳаракатлар ва қўшинлардаги эҳтиёжлар асосида қайта шакллантирилмоқда. Янги ўқув дастурларида назария ва амалиёт уйғунлигига устувор аҳамият берилиб, курсантларнинг хизмат жараёнига яқин шароитда тайёрланиши кўзда тутилган.
Шу билан бирга, бакалавр босқичида таҳсил олувчи ҳарбий кадрларга хорижий тиллар, ахборот технологиялари ва сунъий интеллектни чуқур ўқитиш режалаштирилмоқда.
Қўмондонлик-штаб офицерлари учун эса илғор хорижий тажриба асосида уч босқичли янги ўқитиш тизими жорий этилади.
Тақдимотда сержантлар тайёрлаш тизимини кенгайтириш масаласи ҳам муҳокама қилинган. Хусусан, олий ҳарбий таълим муассасаларида сержантлар учун олтита фуқаролик мутахассислиги бўйича масофавий таълим йўлга қўйилиши айтилган.
Шунингдек, авиация ва дронлар соҳасида мутахассислар тайёрлаш тизими такомиллаштирилиб, Қуролли Кучлар ҳарбий хизматчилари учун ягона сертификатлаш тартиби жорий этилади.
Тақдимотда армияни рақамлаштириш ва киберхавфсизлик масалаларига ҳам алоҳида тўхталиб ўтилган.
Қайд этилишича, кейинги йилларда Мудофаа вазирлиги тизимида алоқа инфратузилмаси модернизация қилинган, ҳимояланган маълумот алмашинуви каналлари ривожлантирилган ва 50 га яқин ахборот тизими ишлаб чиқилган.
Хусусан, “Чақирув” электрон тизими 19 та вазирлик ва идора билан интеграция қилиниб, чақирув жараёнларини тўлиқ электрон шаклда амалга ошириш имкони яратилган.
Ҳарбий тиббиёт соҳасида эса ягона тиббий ахборот тизими ва телемедицина жорий этилган.
Шу билан бирга, кибертаҳдидларни аниқлаш ва уларнинг олдини олиш мақсадида Ахборот хавфсизлиги мониторинг маркази ташкил этилгани маълум қилинди.
Тақдимот якунида Президент армияни рақамлаштириш, сунъий интеллект технологияларини жорий этиш ва киберхавфсизликни кучайтиришга қаратилган қатор ҳужжатларни имзолаган.
Шунингдек, Мудофаа вазирлиги марказий аппаратида Рақамли технологиялар бош бошқармаси, Сунъий интеллект технологиялари департаменти ва Киберхавфсизлик лабораторияси ташкил этилиши режалаштирилмоқда.
Президент мутасаддилар олдига мудофаа соҳасини тўлиқ рақамлаштириш, миллий сунъий интеллект моделларини яратиш ва малакали ҳарбий кадрлар тайёрлаш тизимини янада такомиллаштириш бўйича вазифалар қўйди.
