Ўзбекистон Солиқ қўмитасида блогерлар фаолияти, уларнинг ҳуқуқий мақоми ҳамда реклама орқали олинаётган даромадларни солиққа тортиш масалаларига бағишланган учрашув бўлиб ўтди. Бу ҳақда қўмита матбуот хизмати хабар қилди.
Маълум қилинишича, блогерлар фаолиятини ўрганиш доирасида соҳанинг энг фаол 110 нафар вакили рўйхатга олинган. Таҳлиллар натижасида уларнинг 55 нафари ўзини ўзи банд қилган шахс сифатида, 33 нафари якка тартибдаги тадбиркор сифатида рўйхатдан ўтгани аниқланган. Қолган 22 нафар эса жисмоний шахс мақомида фаолият юритмоқда.
Солиқ қўмитасига кўра, бу ҳолат блогерларнинг амалдаги фаолияти кўлами билан уларнинг ҳуқуқий мақоми ўртасида муайян номувофиқлик мавжудлигини кўрсатади.
Шунингдек, 3 миллиондан ортиқ обуначига эга 6 нафар топ-блогер фаолияти алоҳида таҳлил қилинган. Қайд этилишича, улар 2025 йил давомида жами 360 та сторис ва 184 та реклама пости жойлаштирган.
Электрон ҳисобварақ-фактуралар орқали тақдим этилган расмий ҳисоботларга кўра, мазкур блогерларнинг умумий даромади 2,7 миллиард сўмни ташкил этган. Улар томонидан бюджетга 110,4 миллион сўм миқдорида солиқ тўланган.
Учрашув давомида блогерларга реклама жойлаштиришдан олинадиган даромадларни солиққа тортиш бўйича қонунчилик нормалари тушунтирилган. Хусусан, ўзини ўзи банд қилган шахс мақоми ходим ёллаш ҳуқуқини бермаслиги, амалда эса айрим блогерлар томонидан администратор, ёрдамчи ва бошқа мутахассислар жалб қилинаётгани қайд этилган.
Томонлар соҳага оид қатор масалаларни муҳокама қилган. Шу билан бирга, блогерлар учун солиқ мажбуриятлари ва ҳуқуқий саводхонликка бағишланган ўқув тадбирларини ташкил этиш таклифи ҳам илгари сурилган.
Солиқ қўмитаси блогерлар фаолиятини солиқ қонунчилиги талабларига мувофиқлаштириш ҳамда даромадлар шаффофлигини таъминлаш муҳим эканини таъкидлаган.
