Манба маълумотига кўра, 61 ёшли мутахассиснинг агенти Пини Захави 7 май куни клуб президенти Жоан Лапорта билан учрашган. Учрашувда томонлар янги шартноманинг якуний тафсилотларини келишиб олган.
Фликнинг амалдаги шартномаси 2027 йилнинг 30 июнига қадар мўлжалланган. Янги келишувга кўра, ҳамкорлик яна бир йилга узайтирилади ҳамда шартномага қўшимча равишда яна бир мавсумга автоматик узайтириш имконини берувчи банд киритилади.
Захави ҳозирда Барселона шаҳрида бўлиб тургани сабабли, шартномани имзолаш маросими яқин кунларда ўтказилиши кутилмоқда.
Маълумот учун, германиялик мутахассис 2024 йилнинг июль ойидан буён Каталония клубини бошқариб келмоқда. Унинг қўл остида жамоа 113 та учрашувда иштирок этиб, 86 та ғалаба, 10 та дуранг ва 17 та мағлубият қайд этган.
Флик бошчилигида “Барселона” дастлабки мавсумнинг ўзидаёқ Испания чемпионати, мамлакат кубоги ва Суперкубокда ғолиб чиққан.
Қайд этилишича, Флик келганидан кейин жамоа нафақат натижалар, балки ўйин услуби жиҳатидан ҳам барқарорликка эришган. Бу эса клуб раҳбариятининг мутахассисга бўлган ишончини янада мустаҳкамлаган.
