Беларус президенти Александр Лукашенко мамлакатга меҳнат мигрантларини жалб қилиш тартиби ва уларга қўйиладиган талабларни очиқлади. Унинг айтишича, бу масала яқинда Беларусга ташриф буюрган Ўзбекистон президенти Шавкат Мирзиёев билан ҳам муҳокама қилинган.
Лукашенконинг сўзларига кўра, айрим ҳудудларда ишчи кучи етишмаётгани сабабли хориждан меҳнат мигрантларини жалб қилиш тизими йўлга қўйилмоқда. Бу жараёнда аввал элчихона номзодларни текширади, сўнг эса корхона раҳбари эҳтиёжига қараб керакли мутахассисларни танлаб олади.
Унинг маълум қилишича, яқин вақт ичида 200 нафарга яқин ўзбекистонлик Витебск вилоятида иш бошлайди. Кейинчалик улар мамлакатнинг бошқа ҳудудларига ҳам эҳтиёждан келиб чиқиб тақсимланади. Зарурат туғилса, меҳнат мигрантлари Беларуснинг ўзида қўшимча ўқитилиши ва қайта тайёрланиши мумкин.
Беларус раҳбари меҳнат мигрантларини жалб қилиш жараёни Ички ишлар вазирлиги назорати остида бўлишини таъкидлади. Унинг сўзларига кўра, ҳар бир ишчи учун уни ишга қабул қилган корхона раҳбари шахсан жавобгар бўлади ва мамлакатга фақат эҳтиёжга қараб мутахассислар қабул қилинади.
Беларус президенти администрацияси раҳбари Дмитрий Крутойнинг айтишича, Шавкат Мирзиёев ҳам ушбу масалани шахсан назорат қилмоқда. Шу муносабат билан Беларусга фақат малакали ўзбекистонлик мутахассислар юборилади.
Айни пайтда Беларусда 7 минг нафарга яқин Ўзбекистон фуқароси рўйхатдан ўтган. Уларнинг бир қисми турли соҳаларда меҳнат қилаётган бўлса, кўпчилиги олий таълим муассасаларида таҳсил олмоқда.
Лукашенко меҳнат мигрантлари учун муносиб яшаш шароитлари яратиш, уларни уй-жой билан таъминлаш ва беларусликлар билан тенг ҳуқуқлар бериш муҳимлигини таъкидлаб, Ўзбекистон билан ҳамкорликни янада кенгайтиришдан манфаатдор эканини билдирди.
