Қўлёзма мактубда Эпштейн ўз тақдирини ўзи белгилаш ҳақида ёзган бўлиб, унда: “Хайрлашиш вақтини ўзи танлай олиш — ёқимли”, деган жумлалар келтирилган.
Эслатиб ўтамиз, америкалик молиячи Жеффри Эпштейн 2019 йил август ойида Манҳеттендаги қамоқхона камерасида ўлик ҳолда топилган эди. Расмийлар унинг ўлимини ўз жонига қасд қилиш сифатида баҳолаган.
Мазкур мактуб Эпштейн билан бир камерада сақланган собиқ полициячи Николас Тарталёне томонидан топилгани айтилмоқда. Қотилликда айбланган Тарталёне ҳозирда умрбод қамоқ жазосини ўтамоқда.
Нью-Йорк федерал судьяси Кеннет Карас The New York Times нашри сўровидан сўнг ҳужжатни очиқлашга қарор қилган. Судьяга кўра, мактуб суд материаллари таркибида бўлгани учун у жамоатчиликка очиқ ҳужжат ҳисобланади.
Шу билан бирга, суд мактубнинг ҳақиқийлигига баҳо бермаган. Судья Карас бу масала ҳужжатни эълон қилиш қарорига дахл қилмаслигини таъкидлаган.
Суд материалларига кўра, сарғиш қоғозга шошилинч тарзда ёзилган мактубда қуйидаги сатрлар бор:
“Мени ойлар давомида тергов қилишди — ҳеч нарса топишмади. Оқибатда 15 йиллик айбловлар пайдо бўлди. Хайрлашиш вақтини ўзи танлай олиш ёқимли. Мендан нима кутгандингиз — дод солиб йиғлашимними?”
Маълумот учун, Жеффри Эпштейн илк бор 2000-йиллар бошида вояга етмаган қизларни жинсий эксплуатация қилиш билан боғлиқ ишларда тилга тушган. 2019 йил июль ойида у яна ҳибсга олиниб, Нью-Йорк ва Флоридада вояга етмаган қизларни жалб қилиш ҳамда уларга нисбатан жинсий зўравонлик қилишда айбланган эди.
Мактуб ҳақидаги маълумотлар дастлаб 2025 йилда Николас Тарталёне иштирок этган подкастлардан бирида айтилган. Бироқ The New York Times бу ҳақда материал эълон қилгач, ҳужжат кенг жамоатчилик эътиборини тортди.
Газетага кўра, мазкур мактуб федерал терговчилар қўлига тушмаган ва Адлия вазирлиги томонидан Эпштейн иши юзасидан аввал эълон қилинган ҳужжатлар орасида ҳам бўлмаган.
