Тошкент Oxford Economics ташкилотининг 2026 йилги "Global Cities Index" рейтингида 343-ўринни эгаллади. Пойтахт Марказий Осиё шаҳарлари орасида Олмаота ва Остонадан кейин учинчи натижани қайд этди.
Рейтингда дунёдаги 1000 та шаҳар иқтисодиёт, инсон капитали, ҳаёт сифати, атроф-муҳит ва бошқарув бўйича баҳоланган.
Тошкент бир йилда 128 поғона юқорилади. Ўтган йилги рейтингда пойтахт 471-ўринда эди.
Шаҳар иқтисодиёт бўйича 188-ўринни, инсон капитали бўйича эса 108-ўринни эгаллаган. Шу билан бирга, ҳаёт сифати бўйича 644-, атроф-муҳит бўйича 806- ва бошқарув кўрсаткичида 825-ўрин қайд этилган.
Oxford Economics Тошкентнинг устунликлари сифатида географик жойлашуви ва малакали ишчи кучини кўрсатган. Муаммолар қаторида эса киши бошига тўғри келадиган ЯИМнинг нисбатан пастлиги, малакали кадрларнинг хорижга кетиши ва сув танқислиги қайд этилган.
Марказий Осиё шаҳарлари орасида Олмаота 265-, Остона 281-, Бишкек 461-, Ашхобод 668- ва Душанбе 672-ўринни эгаллаган.
Умумий рейтингда Нью-Йорк биринчи ўринни қайд этган. Кейинги ўринларда Лондон, Париж, Сиэтл ва Сан-Франциско жойлашган.
