Тошкентда автобусда йўлкира ҳақини тўламаган ва назоратчига қаршилик кўрсатган йўловчига 3 сутка маъмурий қамоқ жазоси тайинланди. Бу ҳақда Транспорт вазирлиги хабар берди.
Маълум қилинишича, "Тошкент шаҳар йўловчи ташишни мониторинг ва назорат қилиш" давлат муассасаси назоратчилари томонидан автобусларда тўлов маданиятини ошириш мақсадида кучайтирилган рейд тадбирлари ўтказилмоқда.
15 август куни Тошкент шаҳрининг Чилонзор туманидаги рейд давомида назоратчилар автобусдан тушган фуқаро М.М.дан йўл ҳақи тўланганини тасдиқловчи ҳужжатни кўрсатишни сўраган. Йўловчи эса турли важларни келтириб, назоратчи талабини бажармаган ва қаршилик кўрсатган.
Фуқаронинг шахсига аниқлик киритиш жараёнида у жанжал кўтариб, назоратчига куч ишлатишга уринган. Ҳолат назоратчига бириктирилган боди-камера орқали қайд этилган.
Мазкур ҳолат юзасидан 24 сентябрь куни Тошкент шаҳар жиноят ишлари бўйича Чилонзор туман судида очиқ суд мажлиси ўтказилган. Суд қарори билан М.М.га 3 сутка маъмурий қамоқ жазоси тайинланган.
Транспорт вазирлигига кўра, "Тошкент шаҳар йўловчи ташишни мониторинг ва назорат қилиш» давлат муассасаси назоратчилари ҳокимият вакили ҳисобланади. Уларга ҳужум қилиш, зўравонлик билан таҳдид қилиш ёки ҳақорат қилиш қонунчиликда белгиланган тартибда жавобгарликка сабаб бўлади.
Шунингдек, йўловчилар автобусга чиқиши билан йўлкира ҳақини тўлаши шарт. Йўл ҳақи автобусга чиқиш вақтида тўланмаса, йўловчи чиптасиз ҳаракатланаётган ҳисобланади.
Чиптасиз ҳаракатланган йўловчиларга Маъмурий жавобгарлик тўғрисидаги кодекснинг 144-моддаси 5-қисмига асосан жарима қўлланилади.
