Қорақалпоғистонда 1 минг иш ўрнига эга олтин қазиб олиш ва қайта ишлаш кластери ташкил этилади. Бу ҳақда 19 сентябрь куни Нукусда ўтказилган йиғилишда маълум қилинди.
Ҳозиргача ҳудуднинг атиги 20 фоизида геология-қидирув ишлари ўтказилган. Қораўзакдаги “Урусоy” конида хитойлик инвестор 33 миллион доллар сармоя киритиб, 200 гектар майдонда 4 тонна олтин захирасини аниқлаган ва 320 та иш ўрни яратган.
Шунингдек, бир ой ичида 1 минг иш ўрнига мўлжалланган олтин кластери лойиҳасини шакллантириш ҳамда конлар захирасини қайта баҳолаш бўйича комплекс геология-қидирув дастурини ишлаб чиқиш топширилди.
Кимё саноатида ҳам янги лойиҳалар амалга оширилади. Қўнғирот ва Бўзатовдаги конлардан техник туз, натрий ва магний сульфат ишлаб чиқариш имкониятлари ўрганилади. Берунийдаги кварцит конида эса 30 миллион долларлик инвестиция ҳисобига кристалл кремний ишлаб чиқариш ва экспортни йўлга қўйиш режалаштирилган.
Кимё саноати бўйича қўшимча 200 миллион долларлик лойиҳаларни амалга ошириб, 5 мингта иш ўрни яратиш вазифаси қўйилди.
