Ой ва Қуёшнинг гравитацион таъсири Ер пўстлоғидаги айрим секин силжишларни қўзғатиши мумкин. Олимлар бундай жараёнлар айрим ҳолатларда йирик зилзилалардан олдин кузатилишини қайд этмоқда. Бу ҳақда “Gizmodo” хабар берди.
Гап “секин зилзилалар” деб аталадиган ҳодисалар ҳақида бормоқда. Оддий зилзиладан фарқли равишда, бундай жараёнларда Ер пўстлоғида тўпланган кучланиш бир неча сонияда эмас, балки кунлар ёки ҳафталар давомида аста-секин бўшайди.
Тадқиқотчилар Ой ва Қуёшнинг тортишиш кучи натижасида юзага келадиган жуда кичик тўлқинсимон кучланишлар тектоник ёриқлардаги ҳаракатни қўзғатиши мумкинлигини аниқлаган. Янги тадқиқотда бу таъсирнинг айниқса ёриқнинг табиий реакция даври билан мос келган пайтда кучайиши мумкинлиги кўрсатилган.
Олимлар моделлаштириш орқали жуда кичик ташқи таъсир ҳам муайян шароитларда ёриқларнинг силжишига сабаб бўлиши мумкинлигини кўрсатган. Бунда асосий омиллардан бири кучланишнинг катталиги эмас, балки унинг вақти ва ёриқнинг ички хусусиятлари ҳисобланади.
Шу билан бирга, мутахассислар бу ҳолат Ой ёки Қуёш ҳар қандай зилзилани келтириб чиқаради, дегани эмаслигини таъкидламоқда. Гравитацион таъсир жуда кичик бўлиб, унинг таъсири геологик шароитга боғлиқ. Секин зилзилаларнинг ўзи ҳам одатда одамлар томонидан сезилмайди.
Шунга қарамай, Ой ва Қуёшнинг тортишиш кучи билан тектоник ёриқлар ҳаракати ўртасидаги боғлиқликни ўрганиш олимларга зилзилалар қандай бошланиши ва Ер остидаги жараёнларни яхшироқ тушунишга ёрдам бериши мумкин.
