2015 йилда Сербия чегарасида қўлида бола кўтариб югуриб кетаётган суриялик муҳожирни оёғидан чалиб йиқитган венгриялик журналист аёл, шартли равишда уч йилга жазоланди, деб хабар берди “Ria.ru” нашри.
N1 телеканалининг ходими бўлган Петра Ласло полициядан қочиб кетаётган, қўлида бола кўтариб олган суриялик муҳожирни оёғидан чалиб йиқитгани акс этган видеоролик ижтимоий тармоқларга жойлаштирилгандан кейин кенг жамоатчиликнинг норозилигига сабаб бўлди.
Ласло ишдан бўшатилди ва ўтган йилнинг сентябрь ойида прокуратура томондан унга нисбатан безорилик айби эълон қилиниб, жиноий иш қўзғатилган эди. Прокуратура берган маълумотга кўра, Ласло эркакнинг иягига, қўлидаги боланинг тиззасига тепган.
Жиноий ишни кўриб чиққан Сегед шаҳар судининг судьяси судланувчининг ҳаракатини жамоат тартибини бузиш, одамларнинг қаҳр-ғазабига сабаб бўлувчи фитна, деб аталди. Адвокатларнинг журналист аёл ўзини ҳимоя қилган, деган арзини судья қабул қилмади.
Журналист тепган суриялик муҳожир кейинчалик Испаниянинг футбол мактабларидан бирига ишга жойлашган.
