Испания Кубоги чорак финал илк баҳсида “Атлетико Мадрид” жамоаси ўз майдонида “Эйбар” футболчилари билан ўзаро кураш олиб борди.
Ушбу учрашувда мадридликлар рақибларига ҳеч қандай имкон қолдирмади ва 3:0 ҳисобида ғалаба қозонди. Учрашувнинг 28-дақиқасида Антуан Гризманн жамоасини олдинга олиб чиққан бўлса, 60-дақиқада Анхел Корреа ҳисобни 2:0 кўринишига олиб келди. Якуний ҳисобни 68-дақиқада Кевин Гамейро ўрнатди.
Шу тариқа “Атлетико” футболчилари жавоб учрашуви олдидан яхшигина натижани қўлга киритдилар. Ушбу жуфтликнинг жавоб учрашуви 25 январда “Мунисипаль де Ипуруа” стадионида бўлиб ўтади.
Аввалроқ "Барселона" жамоаси сафарда "Реал Сосьедад"ни кичик — 1:0 ҳисобида енггани ҳақида хабар берилганди.
“Атлетико” – “Эйбар” 3:0
Голлар: 1:0 – 28 Гризманн, 2:0 – 60 Корреа, 3:0 – 68 Гамейро.
“Атлетико” – Мойя, Хуанфран, Хименес, Савич, Филипе Луис, Феррейра Карраско (Габи, 66), Коке, Гризманн, Сауль, Корреа (Гамейро, 63), Гайтан (Годин, 77).
“Эйбар” – Йоэль, Капа, Гальвес, Лежен, Ривера, Гонсалес (Энрик, 65), Эскаланте (Саррьеги, 74), Рико, Инуи (Луна, 65), Пенья, Бебе.
Огоҳлантиришлар: Эскаланте (27), Сауль (63), Рико (67), Гальвес (85).
