Бугун, 23 январь пойтахтдаги International Hotel Tashkent меҳмонхонасида 2017-2021 йилларда Ўзбекистон Республикасини ривожлантиришнинг бешта йўналишлари бўйича Ҳаракатлар стратегияси лойиҳасининг жамоатчилик муҳокамасига бағишланган медиа-ҳафталик старт олди. Медиа-ҳафталикда эксперт ва журналистлар жамоатчилиги, давлат ҳокимияти ва бошқаруви органлари, жамоат ташкилоти вакиллари, таниқли шахслар иштирок этмоқда.
Криста Пиккат, ЮНЕСКОнинг Ўзбекистондаги ваколатхонаси раҳбари:
“Ўзбекистон Республикасини ривожлантиришнинг бешта йўналишлари бўйича Ҳаракатлар стратегияси лойиҳасининг жамоатчилик муҳокамасига бағишланган медиа-ҳафталикда иштирок этаётганимдан мамнунман. Мазкур медиа-майдонча дипломатик корпус вакилларининг самарали фаолият юритишлари учун барча шарт-шароитларни ўзида жамлаган. Бу ўта қувонарли ҳол. Медиа-ҳафталик дастуридан ўрин олган Ҳаракат стратегиясининг бешта йўналиши тақдимотлари, улар юзасидан очиқ муҳокама ва мунозара тарзида бўлиб ўтадиган брифинг ва матбуот анжуманлари қизиқарли ва фойдали тарзда ўтади, деган умиддаман”.
