Ҳилол Насимовнинг ватанпарварлик руҳидаги навбатдаги фильми катта экранларга чиқиш арафасида(Фото ва видео)

Кинорежиссёр Ҳилол Насимов “Муқаддас истак” деб номланган фильм суратга олди. Фильмда 1989-йилдан 1992 йилгача бўлган давр воқеалари ҳақида ҳикоя қилади. "Муқаддас истак"да бош ролларни Жамила Шермуҳаммедова, Лола Элтоева, Гулбаҳор Йўлдошева,Шоҳруҳ Насимов, Эркин Комилов, Соҳиб Аббосхон, Толиб Мўминовлар ижро этган. Фильм намойиши тез кунда бўлиб ўтиши режалаштирилган.

“Аслида, Мустақиллигимизнинг 20 йиллигига камида 20 қисмдан иборат сериал суратга олиш учун тўлақонли сценарий ёзиб, катта тайёргарлик кўргандим. Лекин баъзи сабабларга кўра бу ният амалга ошмади. Ниятим холис экан, "Ўзбеккино" Миллий агентлиги буюртмасига кўра тугал сценарий билан реал воқеаларга асосланган, аниқроғи, 1989 йилдан 1992 йилгача бўлган давр воқеаларини ўзида қамраб олган "Муқаддас истак" фильмини суратга олдим. Экстремизм ҳақида кўплаб фильмларим бор, лекин уларнинг келиб чиқиши, юртимизга кириб келиш таг-замири қаердалиги очиқ савол бўлиб қолган. "Муқаддас истак" фильми орқали мазкур саволга жавоб топиш имкони бўлади. Танг аҳволга келиб қолган давлатнинг инқирози, бир бурда нонга қандай эришилгани, оч-наҳор аҳолининг чорасизлиги ҳақидаги гаплар бугунги ёш авлодга чўпчакдек туюлиши мумкин. Лекин реал воқеаларни экранда кўргач, ҳар бир томошабинда бугунги фаровон ҳаётимиз, мустақиллигимизга шукр қилиб, уни асраб-авайлаш ҳиссини кучайтиришига ишонаман. Катталаримиз "Ўтган кунингни унутма, эски чориғингни қуритма", деб бежиз айтишмаган, ахир”,—дейди режиссёр фильм ҳақида.

Фильм сценарийсини ҳам Ҳилол Насимовнинг ўзи ёзган. Бу ҳақда режиссёр қуйидаги фикрларни билдирди:

“Агар кўнгилдагидек сценарий ёза оладиган сценарийнавис бўлса, бажонидил бу ишни унга топшириб, ўзим тайёргарлик ишлари билан шуғулланган бўлардим. Сценарий ёзиш осон иш эмас, фильм реал воқеаларга асосланган, сиёсий воқеаларни ўз ичига олгани боис ҳар бир детални ўрганиб чиқишга тўғри келади. Айтиб ўтиш жоиз, бу ишда ҳуқуқ-тартибот идораларининг ёрдами катта бўлди.

Сценарий ёзишнинг қулайлиги шундаки, қоралама ёзиш асносида хаёлимда кадрлар шаклланади, аниқ актёрлар кўз олдимга келади. Вақтимни қизғонганим боис сценарийни тезис шаклида ёзаман. Авваллари бадиий кенгаш аъзолари "Бадиийлик, аниқ тасвирлар етишмаяпти", деб қайтаришарди. Кейинчалик эса аниқ кадр-лар тезисдан ўрин олгани, қолгани тасаввуримда шакллангани ва улар бирлашиб, яхлит фильм бўлишини тушуниб етишди (кулади).

Яқинда бир-иккита режиссёрга оригинал сценарийни режиссёрлик сценарийсига ўгириб, қайта ишлаш ишониб топширилганида давлатнинг анчагина маблағини еб юришгани, лекин натижа бўй кўрсатмаганига гувоҳ бўлдик. Охири уларни топширилган фильмдан четлатишга ҳам тўғри келди. Айтмоқчиманки, сценарий ёзиш учун ҳам етарлича тажриба талаб этилади”.