​Бор-будини хайр-саховат учун сарфлаган собиқ миллиардер ва миллионерлар

Бу инсонларнинг амалга оширган ишлари ҳурмат-эътиборга лойиқ. Ҳаётда кўп нарсага эришган мазкур одамлар ўз давлатининг, бойлигининг қулига айланиб қолмади, балки умри давомида топган-тутганини муҳтожларга улашди. Улар ҳамма бойлигини тарқатиб юборган бўлсалар-да, барчанинг тасаввурида дунёнинг энг бадавлат кишиси бўлиб қолаверади.

Владислав Тетюхин,
Йирик металлургия компаниясининг собиқ ҳамкори

Россиянинг Свердловск вилоятида яшовчи 82 ёшли миллиардер Владислав Тетюхин иссиқ ўлкалардан вилла сотиб олишга ҳаракат қилмади. У ўзининг барча акцияларини сотиб, сотувдан тушган 3,3 миллиард рублга Нижний Тагил шаҳрида тиббиёт марказини қуриб, ишга туширди. Миллиардер келажакда клиника ходимлари учун 350 та квартира, меҳмонхона, талабалар ётоқхонаси, транспорт блоги ва вертолёт майдончаси қуришни режалаштирди. Ҳозирда Тетюхин бош директор лавозимида ишлайди. 82 ёшга тўлганига қарамай, ҳафтанинг 6 куни мобайнида иш тартибига риоя қилган ҳолда соат 9:00 дан меҳнат фаолиятини бошлайди. Нижний Тагил шаҳрининг мэри тиббиёт маркази яқинидаги жамоатчилик транспорти бекатини Владислав Тетюхин номи билан аташга ваъда берди.

Чак Фини,
Duty Free асосчиси

1988 йилда Forbes журнали Чак Финини бадавлат инсонлар рўйхатининг 31 қаторига жойлаштирди. Бунга бойлигининг ҳаммаси ўзига тегишли бўлмагани ҳам сабаб бўлганди. Фини аноним равишда ўзига тегишли бўлган бойликни турли-туман корхона ва ташкилотларга хайрия қилди. Кўп ҳолларда хайрия маблағига эга бўлганлар уларга ким хайр-саховат қилаётганидан бехабар бўлган. Чунки Чак Фини ўзи ёрдам кўрсатаётган ташкилотлардан номини ошкор қилмасликни талаб қилган.

Чак Фини барча пулларни “The Atlantic Philanthropies” жамғармаси номидан хайрия қилган. Маълумотларга кўра, мазкур жамғарма шу кунга қадар 6,2 миллиард доллар маблағни хайр-эҳсон учун сарфлаган.

“Инсон пулини эҳсон қилганида ва берган пулидан шифохона қурилганини кўрганида қалбини қувонч забт этишига ишонч ҳосил қилдим. Пулларни банкка қўйиб кўпайтиргандан кўра, эзгу ишлар учун сарфлаш мантиқан тўғри бўлади”, — дейди Фини.

Браин Берни
Қурилиш ва кадр танлаш соҳаси бизнесининг собиқ эгаси

Миллионернинг бошига кулфат тушгунга қадар ҳаммаси аъло даражада эди. Браин Бернининг рафиқаси саратон касалига чалингани маълум бўлди. Бу воқеа унга қаттиқ таъсир қилди, у хайрия ишлари билан шуғулланишга қарор қилди ва бойлигининг маълум қисмини тиббиёт машиналари коллонаси ташкил этишга сарфлади. Мазкур тиббиёт машиналари Шимолий Англиянинг энг чекка қишлоқларида яшовчи аҳолисига юқори малакали тиббиёт хизматини кўрсата бошлади. Шифокорларнинг маошини Браин Берни ўз ҳисобидан тўлади.

Бир йил давомида дард билан курашган рафиқаси саратонни енгишга муваффақ бўлди. Бундан қалби қувончга тўлган Браин Берни мол-мулкининг каттагина қисмини сотиб, ҳамма пулни хайрияга сарфлади. Шундан кейин хайрия жамғармаси биносида жойлашган кичкина бинога кўчиб ўтиб, ҳаётини саратон касаллиги билан курашишга бағишлади. Ҳозирда у нафақаси ҳисобига кун кўради ва эски машинада юради.

Олаф Тон,
норвегиялик миллиардер

Норвегиялик миллиардер Олав Тон ўзининг 6 миллиард доллар бойлигини тиббиёт соҳасидаги тадқиқотларни молиялаштириш учун сарфлашга қарор қилди. У умри давомида ишлаб топган пуллари эзгулик учун сарфланишини истади ва ўзининг бу ҳаракатини “Ахир ўлганимда бойлигимни нариги дунёга олиб кетолмайман-ку...” деб изоҳлади.

Олаф Тоннинг ўзи камтарона ҳаёт кечиради. Оилали бўлса-да, фарзанд кўрмаган. Шунинг учун бор бойлигини хайрия қилишни ният қилди. “Бирор жойга бориш учун велосипед ва чанғим бор. Озгина овқатга қорним тўяди. Шундай экан ҳаммаси яхши бўлади”, дейди собиқ миллиардер нашрларга берган интервьюсида.

Тим Кук,
Apple компанисининг бош директори

Тим Кукнинг бойлиги 800 миллион доллар деб баҳоланган. 54 ёшли бизнесмен 10 ёшли жиянининг ўқиши учун тўловни амалга оширгандан кейин қолган барча бойлигини хайрия ишлари учун сарфлашни мақсад қилди. У хайрия ишлари учун пул ўтказаётган бўлса-да, бу пулларни қандай хайрия ишларига сарфлаётганини ошкор этмади. Кукнинг айтишича, у шунчаки чекларга имзо чекмасдан, хайриянинг тизимли муносабатини яратишни мақсад қилган.

Шаҳзода ал-Валид,
Саудия қироллик оиласи аъзоси

Шаҳзода ал-Валид бойлигини хайрия ишлари учун сарфлади. У биринчи навбатда аёллар ҳуқуқини ҳимоя қилувчи ташкилотларга, бедаво дардларнинг давосини топишда тадқиқот ишларини олиб борувчи тиббиёт муассасаларига, табиий офатдан жабрланганларга ҳомийлик қилиб, соғлом турмуш тарзини тарғиб қилди.

Шаҳзода ўзининг Twitter саҳифасида Яратган унга жуда катта бойлик ҳадя этганини, мазкур бойликни муҳтожлар билан баҳам кўриши лозимлиги ҳақида ёзди. Унинг бундай қарорга келишига ўзининг Gates Foundation хайрия жамғармасини ташкил этган Microsoft асосчиси Билл Гейтс сабабчи бўлганлигини таъкидлади.