Сочи шаҳар мактабларидан бирида ўқувчиларининг 8 март байрамига беш минг рубль совға берганидан норози бўлиб, ота-оналарга SMS ёзган синф раҳбари ишдан бўшади, деб хабар берди “Tjournal.ru” нашри.
Сочи шаҳар кенгашига қарашли маориф, фан ва маданият қўмитаси раиси Владимир Давидовнинг маълумот беришича, ўқитувчи аёл хизмат текшируви тугашини кутмай, ишдан бўшаган. У жанжал кўтарилгандан кейин вақтинчалик вазифасидан озод этилган эди.
Ўқитувчи аёл 7 март куни ўқувчиларидан олган совғасидан норози бўлиб, уларнинг ота-онасига синф раҳбарлигидан бўшаш билан таҳдид қилиб, SMS хабар жўнатган. Аввалига кўпчилик бу хабарни ўқитувчи аёл ёзганига шубҳаланди, аммо у “Комсомольская правда” нашрига берган интервьюсида SMS хабарларни жаҳл устида ўзи ёзганлигини тан олди.
Кейинроқ Life нашри ишдан бўшаган ўқитувчини ота-оналар ҳимоя қилгани, унинг яхши педагог эканлиги, ўша куни болалар синфда тўполон қилиб, хайфсан олгани учун жаҳл устида SMS ёзгани ҳақида хабар берди.
