Красноярск ТВК телеканалининг “Новое утро” кўрсатуви бошловчиси Александр Смол жонли эфирда маҳаллий Қонунчилик кенгаши депуталари ўз маошларини икки баробар — 200 минг рублгача оширганини маълум қилиб, уларни “мақтади”, деб хабар берди Tjournal.ru нашри.
Бошловчи халқ депутатларини жуда чиройли сўзлар билан “мақтади”. У депутатларга мазкур ишлари учун “миннатдорчилик билдириб”, студиядаги ходимлар билан бирга уларнинг ишини “олқишлаб”, чапак чалди.
Красноярск Қонунчилик кенгаши депутатлари сўнгги сессияда бир овоздан маошларини икки баробар оширишга келишишди. Улар энди барча қўшимчаларни ҳисобга олган ҳолда ойига 200 минг рублдан маош оладиган бўлишди.
ТВК — Красноярск шаҳридаги мустақил телекомпания бўлиб, 1994 йилдан бери фаолият юритиб келади. Телеканал 12 маротаба “ТЭФИ-Регион” телевизион мукофотига сазовор бўлган.
